Ապրիլի 7-ը՝ Առողջապահության համաշխարհային օր

Ամեն տարի ապրիլի 7-ին՝ Առողջապահության համաշխարհային կազմակերպության (World Health Organization, WHO, 1948) հիմնադրման օրը, նշվում է որպես առողջապահության համաշխարհային օր (World Health Day):

Հիմնադրման պատմական օրից մինչև այսօր աշխարհի մոտ երկու հարյուր պետություն դարձել է Առողջապահության համաշխարհային կազմակերպության (ԱՀԿ)  անդամ:

Այս օրը տոնելու ավանդույթը սկիզբ է առել 1950 թվականին: Այն նպատակ ունի մարդկանց ցույց տալու, թե որքան կարևոր նշանակություն ունի առողջությունը իրենց կյանքում,  և որոշել, թե ի՛նչ կարելի է անել աշխարհում մարդկանց առողջական վիճակի բարելավման համար:

Ամեն տարի Առողջության համաշխարհային օրը նվիրվում է մոլորակի առողջապահության առաջ կանգնած խնդիրներին և անցկացվում է տարբեր նշանաբաններով, ինչպես՝ «Քո արյան անվտանգության մեջ է բազմաթիվ մարդկանց փրկությունը», «Կենսունակությունը երկարակեցության ուղին է», «Հղիությունը կյանքում յուրօրինակ իրադարձություն է: Եկե՛ք այն անվտանգ դարձնենք», «Պահպանենք առողջությունը կլիմայական փոփոխություններից»:

2009 թվականին այդ օրվա գլխավոր թեման դարձավ բժշկական հաստատությունների անվտանգությունը և առողջապահության աշխատակիցների՝ մարդկանց, արտակարգ իրավիճակների տուժածներին  օգնություն ցույց տալու պատրաստակամությունը: Ողջ աշխարհում անցկացվում էին բժշկական հաստատությունների անվտանգ կառուցմանը և արտակարգ իրավիճակներում պատրաստվածության բարձրացմանը նվիրված միջոցառումներ:

2010 թվականին նշանաբան է ընտրվել «Հազար քաղաքներ՝ հազար կյանքեր» արտահայտությունը, քանզի այդ օրը ուշադրության կենտրոնում էին ուրբանիզացիան և առողջությունը: Ողջ աշխարհում անցկացվեցին միջոցառումներ՝ նվիրված նրան, որ քաղաքների փողոցներում ստեղծվեն առողջապահական միջոցառումների անցկացման պայմաններ: Փողոցներում անցկացվեցին մրցություններ, որոնց լուսաբանումները ուղված էին լինելու քաղաքներում առողջ կենսակերպին:

2011 թ. թեման, որը քննարկվում էր Օրվա միջոցառումների  ընթացքում, հակամանրէային դեղամիջոցների հանդեպ կայունությունն էր: Բժիշկներն անհանգստացած են հակամանրէական թերապիայի արդյունավետությունը սահմանափակող հակաբիոտիկների հանդեպ վարակիր մանրէների կայուն ձևերի առաջացման հրատապ խնդրով: Առողջապահության համաշխարհային կազմակերպությունը  կարծիք է հայտնում, որ ներկա ժամանակներում դա դեռևս լուրջ խնդիր չի դարձել, բայց իրավիճակը մոլորակի վրա կանխատեսելիորեն փոփոխվում է, և մոտ ապագայում խնդիրը կարող է արդիական դառնալ: Հենց այդ պատճառով պետք է ձեռնարկել շտապ և համատեղ ջանքեր՝ կանխարգելելու հակաբիոտիկների հանդեպ մանրէների կայուն ձևերի առաջացումը:

2012 թ. Առողջության համաշխարհային օրվա թեման «Ծերացումը և առողջությունն» էր, կարգախոսը՝ «Լավ առողջությունը կյանքին տարիներ է ավելացնում»: Ուշադրությունն ուղղված էր մարդկանց ամբողջական և արդյունավետ կյանք վարելուն անհրաժեշտ առողջության պահպանմանը, որը կօգնի նրանց շարունակել օգտակար մնալ հարազատների և հասարակության համար: Անկախ նրանից, թե որտեղ և ինչ պայմաններում ենք ապրում, ծերացումը վերաբերում է յուրաքանչյուրիս,  ու կյանքի լավագույն տարբերակում։.

2013 թ. Առողջության համաշխարհային օրվա թեման զարկերակային գերճնշումն է: Այն մեծացնում է ինֆարկտի, ինսուլտի, սրտային անբավարարության  զարգացման վտանգը: Աշխարհում տարեցների մոտավորապես 40%-ի մոտ զարգանում է զարկերակային գերճնշում: Կա կարևոր փաստ. այն կարելի է կանխել և բուժել:

2014 թվականին Առողջության համաշխարհային օրվա թեման փոխանցողներով պայմանավորված հիվանդություններն են, որոնց մշտական սպառնալիքի տակ է ապրում աշխարհի բնակչության կեսից ավելին: Դրանցից շատերը` մալարիան, Դենգեյի տենդը, լեյշմանիոզը, դեղին տենդը, առավելապես ազդում են աշխարհի աղքատ երկրների բնակչության վրա, սակայն բնապահպանական, կլիմայական փոփոխությունները, մարդկանց ու ապրանքների ավելացող տեղաշարժերը, քաղաքական և սոցիալ-տնտեսական ճգնաժամերը նպաստում են այդ հիվանդությունների լայն տարածմանն ու բնակչության նորանոր խմբերի խոցելիության բարձրացմանը:

Առողջության համաշխարհային օրը մեր մոլորակի յուրաքանչյուր բնակչի ուշադրությունն ուղղում է առողջության և առողջապահության խնդիրներին՝ առողջության և մարդկանց բարեկեցության պաշտպանության համար համատեղ գործողություններ անցկացնելու նպատակով:

Հարցեր, պատասխաններ, մեկնաբանություններ